अहिल्यानगर जिल्ह्याचे भूमीपूत्र आयपीएस डॉ. सुधाकर पठारे यांचे तेलंगणात अपघाती निधन

पारनेर (प्रतिनिधी) - पारनेर तालुक्यातील वाळवणे गावचे भूमीपूत्र असणारे आयपीएस सुधाकर पठारे यांचे शनिवारी (दि.२९ मार्च) अपघाती निधन झाले आहे. तेलंगणातील श्रीशैलम येथून ते नागरकुरलूनकडे जात असताना त्यांच्या कारचा अपघात झाला आणि त्यामध्ये त्यांचा जागीच मृत्यू झाला आहे. सुधाकर पठारे हे ज्या गाडीतून प्रवास करत होते, त्या गाडीची ट्रकसोबत धडक झाली आणि हा अपघात झाला. पठारे हे २०११ बॅचचे आयपीएस अधिकारी होते. त्यांच्या यांच्या अपघाती निधनामुळे महाराष्ट्र पोलिस दलासह पारनेर तालुक्यावर शोककळा पसरली आहे. सदर अपघातात परभणी येथील कंत्राटदार भागवत खोडके यांचाही मृत्यू झाला आहे. भागवत खोडके हे सुधाकर पठारे यांचे साडू भाऊ होत.

वाळवणे (ता. पारनेर) येथील सुधाकर पठारे सध्या मुंबई पोलिसमध्ये पोर्ट झोनचे डीसीपी म्हणून कार्यरत होते. सुधाकर पठारे हे ट्रेनिंगसाठी हैदराबादमध्ये गेले होते. त्या ठिकाणी त्यांच्या एका नातेवाईकासह ज्योतिर्लिंगाच्या दर्शनासाठी जात असता हा अपघात झाला. या अपघातात पठारे यांच्यासोबत असणारे त्यांचे साडूभाऊ व परभणी येथील कंत्राटदार भागवत खोडके यांचाही मृत्यू झाला आहे.  दरम्यान, या घटनेची माहिती तेलंगणा पोलिसांना मुंबई पोलिसांना कळवली आहे. स्पर्धा परीक्षा देत असताना १९९५ साली ते जिल्हा विशेष लेखापरीक्षक झाले. यानंतर १९९६ साली विक्रीकर अधिकारी वर्ग १ म्हणून त्यांची निवड झाली. १९९८ साली पोलिस उपअधीक्षक म्हणून त्यांची निवड झाल्यानंतर पोलिस खात्यातच ते रमले. आतापर्यंत त्यांनी पोलिस उपअधीक्षक म्हणून पंढरपूर, अकलूज, कोल्हापूर शहर, राजुरा येथे सेवा बजावली आहे.

अप्पर पोलिस अधीक्षक म्हणून चंद्रपूर, वसई तर पोलिस अधीक्षक म्हणून सीआयडी अमरावती येथे सेवा बजावली आहे. पोलिस उपायुक्त म्हणून मुंबई, ठाणे, पुणे, वाशी, नवी मुंबई, ठाणे शहर येथे सेवा बजावली आहे. डॉ. पठारे यांनी पोलिस खात्यात सेवा बजावताना संघटित गुन्हेगारी (मोक्का), तडीपारी, एमपीडीए अशा प्रतिबंधात्मक कारवाईंचा धडाका लावला होता. कायदा व सुव्यवस्था अबाधित राखण्याबरोबरच त्यांनी पोलिस दलात अनेक विविध उपक्रम राबवले आहेत.