अहिल्यानगर (प्रतिनिधी) - हातउसने दिलेल्या पैशाकरिता, भाडेतत्वावर घेतलेला ट्रॅक्टर माघारी न देता पैशाची सतत मागणी करून मानसिक त्रास दिल्याने कृष्णा श्रीनाथ काळे (वय २०, रा.शिवाजी नगर, केडगाव) या तरुणाने रेल्वे गाडी खाली आत्महत्या केल्याची घटना ५ फेब्रुवारी रोजी पहाटेच्या सुमारास घडली होती. या प्रकरणी दोघांविरुद्ध आत्महत्येस प्रवृत्त केल्याप्रकरणी गुन्हा दाखल करण्यात आला आहे.
या बाबतची माहिती अशी की मयत कृष्णा काळे याचा ट्रॅक्टर त्याच्या ओळखीचा शरद रामचंद्र जाधव याने त्यांचे शेतीचे कामासाठी भाड्याने जामखेड येथील जिकरी गावी घेऊन गेला होता. त्यानंतर जुलै २०२४ महिन्यात कृष्णा काळे याचा साखरपुड्याचा कार्यक्रम असल्याने शरद जाधव याने त्याचे कार्यक्रमासाठी मदत म्हणुन ३० हजार रुपये हातउसने दिले होते. मागील काही दिवसांपासुन कृष्णा काळे यास ट्रॅक्टरची गरज असल्याने तो वारंवार शरद जाधव यास ट्रॅक्टरची मागणी करीत होता.
परंतु शरद जाधव हा आज देतो, उदया देतो असे म्हणुन वेळ मारुन नेत असे. ३०जानेवारी रोजी कृष्णा काळे हा जिकरी या गावी गेला असता त्याला तेथे शरद जाधवच्या सासरवाडीत ट्रॅक्टर मिळुन आला नाही. त्यावेळी कृष्णाने शरद जाधवकडे ट्रॅक्टरबाबत विचारणा केली असता, शरद जाधव याने तुझा ट्रॅक्टर आणुन देतो असे सांगितले. परंतु त्याने ट्रॅक्टर आणून दिला नाही. ३ फेब्रुवारी रोजी शरद जाधव याने शिवीगाळ, दमदाटी करुन तु मला ५० हजार रुपये दे तेव्हाच तुझा ट्रॅक्टर देतो असे बोलला.
त्यानंतर दुसऱ्या दिवशी कृष्णा याने शरद जाधव याला ३० हजार रुपये आत्ता देतो व बाकीचे राहिलेले पैसे नंतर देतो असे सांगीतल्यावर शरद जाधव याने मला पुर्ण ५० हजार रुपये पाहिजेत, तेव्हाच तुझा ट्रॅक्टर तुला परत देईन असे म्हणाला. त्यानंतर दुपारी शरद जाधव सोबत एक इसम असताना तो कृष्णा यास "तुझ्याकडुन पैसे देणे होत नसेल तर तु जीव देऊन टाक" तसेच शरद जाधव सोबत असलेल्या इसमाने सुध्दा तु समोर असलेल्या रेल्वे पटरीवर जीव देऊन टाक असे म्हणाले. त्यावेळी कृष्णा खुप निराश झाला.
या नंतर ५ फेब्रुवारी रोजी पहाटे २ वाजण्याचे सुमारास कृष्णा याचा मृतदेह रेल्वे पटरीवर मिळून आला. शरद जाधव व त्याच्या सोबत असलेल्या इसमाने दिलेल्या त्रासाला कंटाळुनच कृष्णा काळे यांनी रेल्वे पटरीवर जाऊन आत्महत्या केली अशी तक्रार कृष्णाचा मामेभाऊ सुनील राजेश कुऱ्हाडे (रा. शिवाजीनगर, केडगाव) यांनी दिल्याने शरद जाधव व एक अनोळखी यांच्याविरुध्द कोतवाली पोलिसांनी आत्महत्येस प्रवृत्त केल्याप्रकरणी गुन्हा दाखल केला आहे. पुढील तपास पोलिस उपनिरीक्षक प्रविण पाटील हे करीत आहेत.
Post a Comment