नगर - नगर-दौंड महामार्गावर हिवरे झरे (ता.नगर) गावाजवळ बुधवारी (दि.४) सकाळी ८ च्या सुमारास मालट्रक आणि मारुती सुझुकी कंपनीची इरटीगा कार यांचा समोरासमोर भीषण अपघात झाला. या अपघातात एका युवकाचा जागीच मृत्यू झाला तर कार मधील अन्य चौघे जण जखमी झाले आहेत. मयत व जखमी हे सर्वजण छत्रपती संभाजी नगरचे रहिवासी आहेत.
आदेश डाकरे (वय २७) असे मयताचे नव असून मयूर कुदळे, अभिजित बच्छिरे, हरीश घडामोडे व समरजित मनसिरे असे जखमींची नावे आहेत. हे सर्वजण मारुती सुझुकी कंपनीच्या इरटीगा कारने (क्र. एम.एच.२० ई वाय १०१२) नगरहून दौंड कडे जात होते. सकाळी ८ च्या सुमारास हिवरे झरे (काळे वाडी) शिवारात १४ मैल जवळ दौंड कडून भरधाव वेगात नगरकडे येत असलेल्या मालट्रक ची (क्र. एच आर ५५ व्ही ४४७८) आणि कारची समोरासमोर जोराची धडक झाली. हा अपघात इतका भीषण होता की कार चा चक्काचूर झाला.
अपघातात कार मधील जखमी अडकून पडले होते. त्यांना बाहेर काढण्यासाठी स्थानिक नागरिक नारायण रोडे, तुषार पवार, शैलेश काळे, पिंटू काळे, नितीन काळे, बापू काळे, राहुल काळे, सुभाष काळे यांनी तातडीने धाव घेतली. बराच वेळ प्रयत्न केल्या नंतर मयत व जखमींना कारच्या बाहेर काढण्यात यश आले. या अपघाताची माहिती मिळाल्यावर शिवसेनेचे उप जिल्हा प्रमुख संदेश कार्ले हे ही तातडीने तेथे दाखल झाले. त्यांनी रुग्णवाहिका तसेच वाहने रस्त्याच्या बाजूला काढण्यासाठी क्रेन बोलावले.
स्थानिक नागरिक व कार्ले यांनी जखमींना उपचारासाठी तातडीने रुग्णवाहिकेतून नगरला पाठविले. नगर तालुका पोलिसांना अपघाताची माहिती मिळाल्यावर पोलिस उपनिरीक्षक अस्लम पठाण, हे.कॉ. राहुल द्वारके यांनी तसेच महामार्ग पोलिसांच्या पथकाने घटनास्थळी धाव घेतली. पोलिसांनी मालट्रक चालक सलीम मोहंमद (रा. मणिपूर) याला ताब्यात घेतले आहे.
नगर-दौंड महामार्गावर बाबुर्डी बेंद फाट्यावर मागील आठवड्यात खाजगी आराम बस उलटून भीषण अपघात झाला होता. त्यात दोघांचा मृत्यू तर ५-६ प्रवासी जखमी झाले होते. ही घटना ताजी असतानाच बुधवारी सकाळी पुन्हा एका भीषण अपघात झाल्याने नगर दौंड महामार्ग मृत्यूचा सापळाच बनला आहे.
महामार्गावरील खड्ड्यांमुळे पुन्हा एक बळी
नगर-दौंड महामार्ग मृत्यूचा सापळा बनत चालला आहे. महामार्गावरील खड्ड्यांमुळे पुन्हा एकाचा बळी गेला आहे. मोठ-मोठे खड्डे पडले आहेत. त्यामुळे वाहनचालकांना प्रचंड त्रास सहन करावा लागत आहे. त्यात पावसाळा सुरू असल्याने प्रवाशांच्या अडचणीत अधिकच भर पडत असून, अपघातही वाढले असल्याने तातडीने या महामार्गावरील खड्डे बुजवावेत, अन्यथा आगामी काळात मोठे अंदोलन छेडले जाईल असा इशारा शिवसेना उपजिल्हा प्रमुख संदेश कार्ले यांनी दिला आहे.
Post a Comment